ali ferzat
ali ferzat

تسجيل دخول


اسم المستخدم :
 
كلمة المرور :
 
 

كاريكاتير


Facebook



أنا ما تخيلت حالي إكتب بهل موقع قبل هلق بصراحة.. ليش ؟ لأني ما حسيت انكون كتير راح تنبسطوا بكتابة واحد متلي لا معارض ولا مؤيد. ايه والله .. من بداية الأحداث وأنا عام إسمع الرأيين..المتشدد المعارض والمتشدد المؤييد والتنين هربوني منون وهلق أنا لاني مع النظام ولاني مع إسقاط النظام. ماني مع النظام لئن في ألف سبب لما يعجبني النظام.. وإنتو سمالله خبراء بهل موضوع، ف ما راح ضيع وقت عليه، بس أنا لهلق ما كنت مع إسقاط النظام لئن شايف إنو لسة كتير بكير على شغلة كبيره قد هي..أول شي، شايف إنو لازم نجبر النظام يغير متل ما بدنا .. يصلح متل ما بدنا .. نجبرو يتيح المجال لتتشكيل حياة سياسية طبيعية بسوريا أول لئن بدونا ما في مجال نشكل نظام أحسن من هاد أو نغير دستور أو أية شي تاني ممكن يحسن البلد… أنا ما بدي يسقط النظام.. قد ما كان مفشكل قبل ما يكون في مجال نعمل غيرو أحسن منو.
يعني برأي كم معارض أنا مولي.. وبرأي كم موالي أنا معارض… وأنا برأي اني لا هيك ولا هيك.. مع اني من وجهة نظر إنسانية أولاً بميل للجهة إلي لهلأ اثبتت أخلاق أعلى ووعي أكتر بوجه أبشع أنواع الاهانات والضغط و بحس بالنفور من الجهة إلي بتخون كل حدا مو منا.
هادا الحكي عني كلو بس مقدمة لحتى تعرفوا ليش صار إلي صار معي اليوم.
واحد متلي حاول يسمع الكل… شو بحس بيوم متل يوم أحد القسم؟ شو بحس بس يشوف الألعاب النارية عمتزين سما الأمويين؟ شو بحس بس يشوف هل ملايين عام تحتفل وتأكد ولاءا للأسد.. بتجمع حاشد؟
أنا كمان ما عندي مانع يبقى الأسد أبداً -حالياً- متل ما قلت قبل… بس مو معقول اطلع مع هلي طلعوا اليوم ليحتفلوا بنص الشام !! مو معقول أبداً!!
ليش؟ لئن هادا اللي صار إليوم ما في عقل بيفهمو!
شو هاد إلي صار؟
إحتفال بشو هاد يعني؟
بدنا نورجي العالم إنو كلنا فدى الأسد؟ إيه مو زابطة… لئن إلي بكوالالمبور صار يعرف إنو في بسورية ناس سوريين عمبطلبو باسقاط النظام. يعني ع مين عمنضحك؟ إنو هل إحتفالات بالشام وبحلب … يعني ميين ما بيعرف إنو بالشام وبحلب الوضع مختلف تماماً عن كتير مدن تانية؟…
بدنا نعمل ضربة إعلامية نكسر راس كل اللقنوات المغرضة واللي عام تبث أخبار المتظاهرين إلي عام بعفسن الأمن -يعرف أيضاً بالعصابات المسلحة حسب بعد المذاهب المتطرفة بالتشبيح-؟ بأكدلكٌ إنو بي ولا قناة غير سورية والدنيا ركزوا عللي صار اليوم … ليش؟ لئن مالو معنى. مانو مادة إعلامية عليا العين..مانو خبر جديد يعني.. صرلون أربعين سنة بيطلعو السوريين مظاهرات تأييد عارمة.. لشو ما عمل وشو ما قال القائد المفدى.. يعني ما بينضحك عالمجتمع الدولي بهيك إحتفالية. كل القنوات والدول صارت تعرف إنو القيادات الأمنية والشمولية متل إلي عننا عند ميت أسلوب لتطلع مظاهرة تأييد.
بدنا ننسى وجعنا ونفرح ونورجي العالم إنو تخطينا الأزمة ورجعنا متل أول وأقوى؟ ليش هدول إلي بالشام هنه إلي توجعوا وحزنوا …أصلاً أصلاً… ايمت كان في أزمة بالشام لنفرح بنهايتا؟ لو شفنا هيك حفلة بدرعا ولا حماه ولا حمص.. كان فينا نقول سورية نسيت وجعا.. لأن الوجع والازمه هنيك مو بنص الشام.
بدنا نثبت لأسدنا إنو نحن كلنا فداء لسباطو…. بعتقد صار هالموضوع واضح عندو.. إنو في كم مليون بضحوا بحياتون منشانو أو علقليلة هيك بقولوا.
أنا ما شفت بحركة اليوم غير شي واحد.. استفزاز سخيف ما في منو غرض غير إنو يوسع الشرخ بين الموالين والمعارضين وبين الشام وحلب -مدن مرضي علييا – والمدن المغضوب علييا.. متل حمص وحماه ودرعا وغيرون.
إذا في سوري طلع اليوم بالإحتفال ومن كل عقلو إنوا سورية بخير.. فللأسف هادا كتير غلطان.
سورية مو بخير إذا كم سوري طلعوا يحتفلوا بالشوارع اليوم عميهتفوا لقائد ولنظام و من يومين مات سوريين غيرون لئنن هتفوا لتغيير هالقائد وهالنظام.
سورية مو بخير إذا السوريين إلي إحتفلوا اليوم بالأمويين شايفين السوريين إلي بحماه وحمص ودرعا هنود حمر و سلفين وقتلن مبرر.
سورية مو بخير إذا الخير ع ناس وناس وإذا سوري بيحميه الأمن وهوه عام يرقص إحتفالاً بقسم القائد، وسوري بيلعن دينو الأمن إذا قال كلمة برى الخط عن القائد… بس لأن الأول ماشي مع النظام والتاني رايو مختلف.. شو منعمل إذا يللي طلع بمظاهرات الحرية رأيو واللا شكلو مو عاجب ألي طلعوا يحتفل تأيداً للرئيس أو برأيون ما بيفهم بالحرية… يمكن معكن حق إنت إلي طلعت دبكت اليوم، ما بيفهم بالحرية…. بس مين إلي قلكوون إنوا الحرية على مفهومكون إنت هيه الصح؟.. و بعدين هادا سوري.. للأسف فينكون تحاولوا تقنعوا حالكون وتقنعوا غيركون إنو هوه مندس وسلفي و-..و..و.. فيكون تشككوا بوطنيتو.. بس للأسف ما فيكون تشككوا إنو سوري متلكون متلو حسب القانون.. وإذا هل قانون بدو يعاملكون على أساس إنتو غير فهادا القانون بدو تغيير.
سورية مو بخير إذا ما فييا تستوعب كل ولادا! سورية مو بخير إذا في سوري بخوون كل سوري ما عجبو رايو.. وببرر قتلو على أساس إنو خاين… وبيطلع يرقص ويحتفل لئن تخلص من خاين.
سورية مو بخير إذا أنا الكاتب … فتحت تمي قدام كم حدا موالي بهل كلمتين.. نشر عرض.. وعملني جحش ما بفهم بمصلحة البلد…وهي أنا متل ما قلتلكون لاني مع إسقاط النظام ولا شي. بس يبدو ما عاد حدا تحمل حدا إذا ختلف عنو حتى لو بنتفه..
سورية مو بخير إذا ما عاد حدا تحمل حدا إذا إختلف عنو بنتفة.
وسورية مو بخير إذا أنا الكاتب… خفت إكتب موضوع متل هاد بموقع مولي.. مع إنو معظم حكيي موجة للموالين لئن بخاف من الجيش الالكتروني يشببحني بلسانو اللطيف وظلو الخفيف.. يعني سورية مو بخير إذا ما في ولا منبر ولا طاقة للواحد يحكي فيها مع صاحب الرأي المختلف بدون ما يتشرشح ويتهمو بالخيانة العظمى.
سورية مو بخير إذا ضلت الحكومة تدعم سوريين ليستفزوا سوريين تانيين… سورية مو بخير إذا يللي يفترض يكون حاميا عام يجر أهلا ليكرهوا بعض ويفهموون إنو هل كره هاد هوه وطنية.. ووعي وإنو لازم يكرهوا لهادا السوري التاني المندس العميل الخاين.
وبالأخر.. أنا قلتلكون بالأول اني مع إنو يضل بشار ويصير إصلاح سريع.. بس أنا ما بتحمل تضل سورية مو بخير..
ومشان هيك ما حدا يلومني ليش كنت عم ابكي من زعلي وسماء الأمويين مزينة بالألعاب النارية.
بكيت لئن هالإحتفالات ما ذكرتني غير إنو سورية أبداً مو بخير.. وهل نظام إلي كنت حاطط أملي فيه عمبخليا هيك الظاهر.
ومشان هيك ما حدا يلومني إذا ما ضلت محايد متل ما كنت قبل أحد القسم.
—————-
منتكس
نقلا عن موقع المندسة السورية
 


43 Like

 
شرشبيل
2011-07-19 12:20:34
الرقص مع الذئاب
7 Like

 

 
شرشبيل
2011-07-19 12:20:34
الرقص مع الذئاب
7 Like

 

 
a Raeef
2011-07-19 12:30:02
احييك استاذ متنكس واحيي روحك الوطنية ... أخي غير رأيك وبلالك هالحيادية والله مابطعمي خبز مانك شايف اللي عم يصير هلأ بالبوكمال وحمص ولا الشام .. ليكني انا صرت معارض وبندر الله يجزا الخير مو منقص عليي شي من الغواصات للطيارات للي بدك اياه ونكاية ببشار قال بدو يساويلنا حفلة بنص تل ابيب والحريري تكفل بالفرقة خخخخخخ اخي من الاخر الله يرحم الشهداء ويشفي المصابين ..وبدك نصيحتي؟؟ ادعم الثورة وانصر المظلوم شو ماكان شكله او لونه ... بتعرف ؟؟؟ انا كنت مثلك وماكنت بدي طير بشار بس بعد مافظع هو واخوه ببانياس ودرعا وحمص وحماه وآخر شي الشام صرت اكرهن كره اسود بس تكريما لدم الشهداء اللي ضحو بيحاتهن مشان حريتنا حرام يروح عالفاضي بدون مقابل وحرام ننساهن وان شالله عن قريب رح نشغله المحرك النفاث ونطيرووووو
26 Like

 

 
a Raeef
2011-07-19 12:30:02
احييك استاذ متنكس واحيي روحك الوطنية ... أخي غير رأيك وبلالك هالحيادية والله مابطعمي خبز مانك شايف اللي عم يصير هلأ بالبوكمال وحمص ولا الشام .. ليكني انا صرت معارض وبندر الله يجزا الخير مو منقص عليي شي من الغواصات للطيارات للي بدك اياه ونكاية ببشار قال بدو يساويلنا حفلة بنص تل ابيب والحريري تكفل بالفرقة خخخخخخ اخي من الاخر الله يرحم الشهداء ويشفي المصابين ..وبدك نصيحتي؟؟ ادعم الثورة وانصر المظلوم شو ماكان شكله او لونه ... بتعرف ؟؟؟ انا كنت مثلك وماكنت بدي طير بشار بس بعد مافظع هو واخوه ببانياس ودرعا وحمص وحماه وآخر شي الشام صرت اكرهن كره اسود بس تكريما لدم الشهداء اللي ضحو بيحاتهن مشان حريتنا حرام يروح عالفاضي بدون مقابل وحرام ننساهن وان شالله عن قريب رح نشغله المحرك النفاث ونطيرووووو
26 Like

 

 
عبودي
2011-07-19 13:02:06
كل هاد و أنت لا معارض و لا موالى ماتصير طرف من الإثنين شو بصتير يالطيف...
9 Like

 

 
عبودي
2011-07-19 13:02:06
كل هاد و أنت لا معارض و لا موالى ماتصير طرف من الإثنين شو بصتير يالطيف...
9 Like

 

 
feddA
2011-07-19 13:09:29
كلام تحريضي وسخيف
7 Like

 

 
feddA
2011-07-19 13:09:29
كلام تحريضي وسخيف
7 Like

 

 
واحد من الناس
2011-07-19 13:15:21
للأسف الشغلة اللي ما عم يفهمها النظام أنو مسيرات التأييد إذا ألقينا نظرة عخريطة العالم ما منشوفها إلا حيث توجد الديكتاتوريات .. أنا كمان متلك حاولت كتير كون محايد .. ولهلق عم حاول لأني خايف من الجايي .. بس المشكلة أنو وجود النظام صار إهانة لأرواح الناس اللي ماتت .. هالإهانة عم تتجلى يومياً بحفلات وغيرو ..
17 Like

 

 
واحد من الناس
2011-07-19 13:15:21
للأسف الشغلة اللي ما عم يفهمها النظام أنو مسيرات التأييد إذا ألقينا نظرة عخريطة العالم ما منشوفها إلا حيث توجد الديكتاتوريات .. أنا كمان متلك حاولت كتير كون محايد .. ولهلق عم حاول لأني خايف من الجايي .. بس المشكلة أنو وجود النظام صار إهانة لأرواح الناس اللي ماتت .. هالإهانة عم تتجلى يومياً بحفلات وغيرو ..
17 Like

 

 
ثورجية
2011-07-19 14:00:38
الظاهر يا صديقي أنك في الطريق لكي تصبح معارض ...لانك حطيت أصبعتك على الوجع ...
13 Like

 

 
ثورجية
2011-07-19 14:00:38
الظاهر يا صديقي أنك في الطريق لكي تصبح معارض ...لانك حطيت أصبعتك على الوجع ...
13 Like

 

 
sa3adeh
2011-07-19 14:11:34
وانا هيييييك تمام متلك كأنك عم تحكي بلساني .....يارب ... من عندك دبرنا.
9 Like

 

 
sa3adeh
2011-07-19 14:11:34
وانا هيييييك تمام متلك كأنك عم تحكي بلساني .....يارب ... من عندك دبرنا.
9 Like

 

 
سوري حر
2011-07-19 14:53:16
اكيد في ناس رح تكتب انا بحترم رأيك ومن هاد الحكي.... أنا بقول لك الابطال عم تطلع كل يوم بوجه الرصاص وحاملين نعشهم على كتفهم منهم مين رجع عالبيت سالم ومنهم مين استشهد او اعتقل الى التعذيب... لك هي الناس عم تضحي بدمها وبروحها مشان نتحرر وانت عم تبخل عليهم بكلمة يسقط النظام والاسوء بدون سبب لا حياد مع المستعمر لاحياد مع حرية الوطن ....تخاذلك مدان
15 Like

 

 
سوري حر
2011-07-19 14:53:16
اكيد في ناس رح تكتب انا بحترم رأيك ومن هاد الحكي.... أنا بقول لك الابطال عم تطلع كل يوم بوجه الرصاص وحاملين نعشهم على كتفهم منهم مين رجع عالبيت سالم ومنهم مين استشهد او اعتقل الى التعذيب... لك هي الناس عم تضحي بدمها وبروحها مشان نتحرر وانت عم تبخل عليهم بكلمة يسقط النظام والاسوء بدون سبب لا حياد مع المستعمر لاحياد مع حرية الوطن ....تخاذلك مدان
15 Like

 

 
غريب في وطنه
2011-07-19 15:00:31
وحياة الله كأنك فتحت دماغي وبدأت تنقل ما فيه حرفاً حرفاً.......... يسلم هالتم وهالقلم وتحيا سوريا مبارح واليوم وإلى الأبد ............ ويسقط بشار الأسد بكرا أو بعد بكرا أو يللي بعدو
13 Like

 

 
غريب في وطنه
2011-07-19 15:00:31
وحياة الله كأنك فتحت دماغي وبدأت تنقل ما فيه حرفاً حرفاً.......... يسلم هالتم وهالقلم وتحيا سوريا مبارح واليوم وإلى الأبد ............ ويسقط بشار الأسد بكرا أو بعد بكرا أو يللي بعدو
13 Like

 

 
Stranger
2011-07-19 15:05:55
سيدي منتكس إني سعيد بانضمامك للمعارضة بعد أن قتل النظام الأسدي الآلاف من المندسين السوريين
11 Like

 

 
Stranger
2011-07-19 15:05:55
سيدي منتكس إني سعيد بانضمامك للمعارضة بعد أن قتل النظام الأسدي الآلاف من المندسين السوريين
11 Like

 

 
ebn alsham
2011-07-19 15:36:01
ياحيف على الناس يللي عم يرقصو ويغنو في ساحة الأمويين والدماء تسيل من اجسام أخونهم السوريين الأحرار ياحيف
13 Like

 

 
ebn alsham
2011-07-19 15:36:01
ياحيف على الناس يللي عم يرقصو ويغنو في ساحة الأمويين والدماء تسيل من اجسام أخونهم السوريين الأحرار ياحيف
13 Like

 

 
مواطن مطحون
2011-07-19 16:12:39
لو كان بشار و نظامه يريدون الاصلاح لما وصلنا الى هذه المرحلة التي نحن فيها الان ... هناك مجرد حديث ووعود عن الاصلاح و مثل ما بيقول المثل لو بدا تشتي كانت غيمت
10 Like

 

 
مواطن مطحون
2011-07-19 16:12:39
لو كان بشار و نظامه يريدون الاصلاح لما وصلنا الى هذه المرحلة التي نحن فيها الان ... هناك مجرد حديث ووعود عن الاصلاح و مثل ما بيقول المثل لو بدا تشتي كانت غيمت
10 Like

 

 
عقاب الجزيرة
2011-07-19 16:32:51
هذا- برأيي- أفضل مقال كتب في هذا الموقع منذ بداية الأحداث وأنا أشكر من قلبي كاتبته وأرجو من الله أن يقرأه الاستاذ فرزات بحيا دية وهدوء
9 Like

 

 
عقاب الجزيرة
2011-07-19 16:32:51
هذا- برأيي- أفضل مقال كتب في هذا الموقع منذ بداية الأحداث وأنا أشكر من قلبي كاتبته وأرجو من الله أن يقرأه الاستاذ فرزات بحيا دية وهدوء
9 Like

 

 
حرية
2011-07-19 17:15:20
ياسيدي اذا أربع أشهر من الدم السوري النازف ماكانوا كافيين ليغيروا موقف الحياد الايجابي عندك وكنت لسه مقتنع انو اللي ما أمر باطلاق النار على الشعب الأعزل هو نفسو اللي سكت وما بدو يحاسب اللي عمل هيك وبيطلع بيحكي عن الجراثيم كان ممكن برأيك يقود الاصلاح لولا حفلة الرقص على دماء الشهداء يعني بشكل أبسط ما تحركت من موقع الحياد تبعك وانت الشاهد على الجرائم اللي ما بدك تسردها لأني الكل بيعرفها متل ما قلت انت في البداية بس اللي زحزحك عن موقعك انك شفت الشبيحة عبيرقصوا و كأني المطلوب منهم اني يحترموا العزا اللي ببيت الجيران ولولا هيك ما كان شفناك هون مع احترامي لموقفك و لكل كلمة كتبتها بس ما عدا السطر الأخير يعني ليش خايف من الملامة وكأني مرتكب شي غلط بس ما بدك حدا يلومك بعدين ليش معتبر حالك منتكس مع انك أكيد مريت بصراع مرير وكانت النتيجة انك صرت حر وكلها كم يوم و رح تشوف حالك طالع يوم الجمعة
11 Like

 

 
حرية
2011-07-19 17:15:20
ياسيدي اذا أربع أشهر من الدم السوري النازف ماكانوا كافيين ليغيروا موقف الحياد الايجابي عندك وكنت لسه مقتنع انو اللي ما أمر باطلاق النار على الشعب الأعزل هو نفسو اللي سكت وما بدو يحاسب اللي عمل هيك وبيطلع بيحكي عن الجراثيم كان ممكن برأيك يقود الاصلاح لولا حفلة الرقص على دماء الشهداء يعني بشكل أبسط ما تحركت من موقع الحياد تبعك وانت الشاهد على الجرائم اللي ما بدك تسردها لأني الكل بيعرفها متل ما قلت انت في البداية بس اللي زحزحك عن موقعك انك شفت الشبيحة عبيرقصوا و كأني المطلوب منهم اني يحترموا العزا اللي ببيت الجيران ولولا هيك ما كان شفناك هون مع احترامي لموقفك و لكل كلمة كتبتها بس ما عدا السطر الأخير يعني ليش خايف من الملامة وكأني مرتكب شي غلط بس ما بدك حدا يلومك بعدين ليش معتبر حالك منتكس مع انك أكيد مريت بصراع مرير وكانت النتيجة انك صرت حر وكلها كم يوم و رح تشوف حالك طالع يوم الجمعة
11 Like

 

 
سليم
2011-07-19 17:18:32
فعلا قمة التفاهة أن تم جمع المأجورين والمرتزقة والمتنفعين من الفساد وأولادهم وعائلاتهم يتم جمعهم ثم حشرهم في الساحات العامة- بعد إعطائهم ألبسة وأزياء متنوعة ومدروسة لتدل على التنوع - بعد قطع الطرق و إحضار وسائل الاعلام الغبية او الرسمية ثم تبدأ المسرحية الفاشلة ويبدأ العالم يضحك علينا أكثر مما ضحك وشبع ضحك على القذافي الأبله الذي يقوم بعمل مشابه هذه الأفعال منتهى التفاهة والسطحية
11 Like

 

 
سليم
2011-07-19 17:18:32
فعلا قمة التفاهة أن تم جمع المأجورين والمرتزقة والمتنفعين من الفساد وأولادهم وعائلاتهم يتم جمعهم ثم حشرهم في الساحات العامة- بعد إعطائهم ألبسة وأزياء متنوعة ومدروسة لتدل على التنوع - بعد قطع الطرق و إحضار وسائل الاعلام الغبية او الرسمية ثم تبدأ المسرحية الفاشلة ويبدأ العالم يضحك علينا أكثر مما ضحك وشبع ضحك على القذافي الأبله الذي يقوم بعمل مشابه هذه الأفعال منتهى التفاهة والسطحية
11 Like

 

 
رائد السوري
2011-07-19 17:47:27
مشاركتك احتوت على جملة فيها كفر بالدين ... كان بإمكانك إيصال الفكرة بدون اللجوء إلى الكفر..أما عن كونك موالي أو معارض...فأنت حر....يعني كل هالقتل اللي صار بسورية ما خلوك تغير رأيك وشوية العاب نارية غيرتلك رأيك..
10 Like

 

 
رائد السوري
2011-07-19 17:47:27
مشاركتك احتوت على جملة فيها كفر بالدين ... كان بإمكانك إيصال الفكرة بدون اللجوء إلى الكفر..أما عن كونك موالي أو معارض...فأنت حر....يعني كل هالقتل اللي صار بسورية ما خلوك تغير رأيك وشوية العاب نارية غيرتلك رأيك..
10 Like

 

 
المندس الجرثومي
2011-07-19 18:52:00
ما تزعل مني بس هادا حكي فاضي و علاك،وخليك عم تبكي
10 Like

 

 
المندس الجرثومي
2011-07-19 18:52:00
ما تزعل مني بس هادا حكي فاضي و علاك،وخليك عم تبكي
10 Like

 

 
عاشق الوطن
2011-07-19 20:49:55
والله يا اخي ما بدها كتير ولا هي مشكلة معارضة ولا مشكلة تاييد يعني المطالبة يحقوق الكائن البشري الاساسية ما بعتبرها معارضة والتاييد للتنازل عن هالحقوق مو تاييد المشكلة اما ان نعيش كبشر او لا
15 Like

 

 
عاشق الوطن
2011-07-19 20:49:55
والله يا اخي ما بدها كتير ولا هي مشكلة معارضة ولا مشكلة تاييد يعني المطالبة يحقوق الكائن البشري الاساسية ما بعتبرها معارضة والتاييد للتنازل عن هالحقوق مو تاييد المشكلة اما ان نعيش كبشر او لا
15 Like

 

 
تلي مندس
2011-07-19 21:24:57
تسلم استاذ علي على هالمناقشة الذاتية اللي بتمنى اي سوري يحاور نفسه بهالطريقة حتى يتوصل للحقبقة.
8 Like

 

 
تلي مندس
2011-07-19 21:24:57
تسلم استاذ علي على هالمناقشة الذاتية اللي بتمنى اي سوري يحاور نفسه بهالطريقة حتى يتوصل للحقبقة.
8 Like

 

 
شامي ميداني
2011-07-19 21:50:16
استاذ علي ......المؤيدين بدون ما يعرفوا عم يشاركوا بقتل السوريين والشغلة مو متل مو مفكرين رأي واختلاف بالرأي .....لاء الشغلة انت ضد السوريين ولا معهن ...وانت ضد قتل السوررين ولا مع قتل السوريين .....ليش عم احكي هيك ...لأنو حفلة الدم بألأمويين يلي صارت هي خيانة وخيانة كبيرة لأنو نحنا والنظام متفقين انو في عالم مقتولين شهداء بإذن الله وفي دم عم ينزل بسوريا وعم تغتصب نساء ويقتل اطفال ويذبح رجال وفوق كل هالشي عم نحتفل .بصراحة المشهد ذكرني باحتفال مصاصين الدماء على جثث البشر وبحب وجه كلمة للشباب في ناس حيادين وهاد مو غلط بس الغلط انك توقف مع المجرم لانو الحيادية بحسن يشوف اغلاطنا وجرائمهم وهون منحسن نقول شو نبدأ نوقف المجرم ولا الغلطان .....نوقف المجرم ونحاسبه وبعدين بالاستقرار منصلح والاصلاح بالوقت الحالي غلط لأنو هلئ مو وقتو ........هلئ وقت اعتقال ومحاسبة المجرمين مهما كان منصبو ولو كان رئيس ولو كان اصغر عامل بس الجزاء من جنس العمل ..........
10 Like

 

 
شامي ميداني
2011-07-19 21:50:16
استاذ علي ......المؤيدين بدون ما يعرفوا عم يشاركوا بقتل السوريين والشغلة مو متل مو مفكرين رأي واختلاف بالرأي .....لاء الشغلة انت ضد السوريين ولا معهن ...وانت ضد قتل السوررين ولا مع قتل السوريين .....ليش عم احكي هيك ...لأنو حفلة الدم بألأمويين يلي صارت هي خيانة وخيانة كبيرة لأنو نحنا والنظام متفقين انو في عالم مقتولين شهداء بإذن الله وفي دم عم ينزل بسوريا وعم تغتصب نساء ويقتل اطفال ويذبح رجال وفوق كل هالشي عم نحتفل .بصراحة المشهد ذكرني باحتفال مصاصين الدماء على جثث البشر وبحب وجه كلمة للشباب في ناس حيادين وهاد مو غلط بس الغلط انك توقف مع المجرم لانو الحيادية بحسن يشوف اغلاطنا وجرائمهم وهون منحسن نقول شو نبدأ نوقف المجرم ولا الغلطان .....نوقف المجرم ونحاسبه وبعدين بالاستقرار منصلح والاصلاح بالوقت الحالي غلط لأنو هلئ مو وقتو ........هلئ وقت اعتقال ومحاسبة المجرمين مهما كان منصبو ولو كان رئيس ولو كان اصغر عامل بس الجزاء من جنس العمل ..........
10 Like

 

 
shadow
2011-07-19 22:23:55
كويس انو في مؤيدين بلشوا يصحوا هيك ويحكوا ويطلعوا من قوقعتن مع العلم بأن لدي الكثير من الملاحظات عما قال..
6 Like

 

 
shadow
2011-07-19 22:23:55
كويس انو في مؤيدين بلشوا يصحوا هيك ويحكوا ويطلعوا من قوقعتن مع العلم بأن لدي الكثير من الملاحظات عما قال..
6 Like

 

 
صبحي
2011-07-19 22:41:48
يا عمي هاد النظام بلي بحبو بدن لطش بالقباقيب حتى تطلع عيونن من أحف راسن..
7 Like

 

 
صبحي
2011-07-19 22:41:48
يا عمي هاد النظام بلي بحبو بدن لطش بالقباقيب حتى تطلع عيونن من أحف راسن..
7 Like

 

 
saamee
2011-07-19 23:34:02
يا شباب المشكلة ليست مؤيد ومعارض ..... هل هناك حيادية مع الشيطان ... الموضوع تعالوا نتخيل انفسنا بتاريخ قبل يوم اندلاع الثورات ونسأل انفسنا من كان مع النظام ومن كان ضده .... هل كان هناك نظام اساسا يتناسب مع اي فكر او معيار او حزب ... هل كان هناك منهجا واضحا تسلكه او يسلكه اي مواطن ملتزم بالانظمة و القوانين يوصل لاي هدف .... يا جماعة بغض النظر عن ا لاحداث الناجمة عن الثورة هل كان هناك نظام دولة .... من رغيف الخبز لمخفر الشرطة حتى عضو مجلس الشعب حتى الوزير وعضو القيادة ورئيس مجلس الوزراء ...جميعهم دمى متحركة آلات تسجيل يا جماعة وصلنا لمنطق الغابة ومنطق المافيات كل ذلك قبل اندلاع الثورات وما كنا نراه هو استمرار لنفس المنطق الفاشل خطة رغيف الخبز فاشلة الوزراء فاشلون خطة التعليم فاشلة أعضاء مجلس الشعب فاشلون اعضاء القيادة القطرية فاشلون .... المحافظون فاشلون الخطة الزراعية والصناعية والعسكرية اثبتت فشلها جميعها وكل ذلك تقرأه بالجرايد الرسمية من شكاوى المواطنين وردود الحكومة والخطابات الاصلاحية لا زلنا نصلح .... الاصلاح يكون لبناء موجود فأي بناء هذا الذي يريدون اصلاحه دخيلكم في واحد يقول لي بند واحد نجح فيه النظام في اي مجال من المجالات ....من شان الله حتى الممانعة انتهت بالاعتراف بحدود اسرائيل دون اي مقابل ...حتى الحل الامني فشل.....
9 Like

 

 
saamee
2011-07-19 23:34:02
يا شباب المشكلة ليست مؤيد ومعارض ..... هل هناك حيادية مع الشيطان ... الموضوع تعالوا نتخيل انفسنا بتاريخ قبل يوم اندلاع الثورات ونسأل انفسنا من كان مع النظام ومن كان ضده .... هل كان هناك نظام اساسا يتناسب مع اي فكر او معيار او حزب ... هل كان هناك منهجا واضحا تسلكه او يسلكه اي مواطن ملتزم بالانظمة و القوانين يوصل لاي هدف .... يا جماعة بغض النظر عن ا لاحداث الناجمة عن الثورة هل كان هناك نظام دولة .... من رغيف الخبز لمخفر الشرطة حتى عضو مجلس الشعب حتى الوزير وعضو القيادة ورئيس مجلس الوزراء ...جميعهم دمى متحركة آلات تسجيل يا جماعة وصلنا لمنطق الغابة ومنطق المافيات كل ذلك قبل اندلاع الثورات وما كنا نراه هو استمرار لنفس المنطق الفاشل خطة رغيف الخبز فاشلة الوزراء فاشلون خطة التعليم فاشلة أعضاء مجلس الشعب فاشلون اعضاء القيادة القطرية فاشلون .... المحافظون فاشلون الخطة الزراعية والصناعية والعسكرية اثبتت فشلها جميعها وكل ذلك تقرأه بالجرايد الرسمية من شكاوى المواطنين وردود الحكومة والخطابات الاصلاحية لا زلنا نصلح .... الاصلاح يكون لبناء موجود فأي بناء هذا الذي يريدون اصلاحه دخيلكم في واحد يقول لي بند واحد نجح فيه النظام في اي مجال من المجالات ....من شان الله حتى الممانعة انتهت بالاعتراف بحدود اسرائيل دون اي مقابل ...حتى الحل الامني فشل.....
9 Like

 

 
saamee
2011-07-19 23:40:53
نسيت ان اضيف مسألة الفساد التي اعترف النظام بوجودها واستفحالها وحتى تاريخه يدرس وضع منهجية و قوانين لمحاربتها وهو المتهم الاول بممارستها بعد كل ذلك عاد في شي اسمه مؤيد ... مؤيد لشو
9 Like

 

 
saamee
2011-07-19 23:40:53
نسيت ان اضيف مسألة الفساد التي اعترف النظام بوجودها واستفحالها وحتى تاريخه يدرس وضع منهجية و قوانين لمحاربتها وهو المتهم الاول بممارستها بعد كل ذلك عاد في شي اسمه مؤيد ... مؤيد لشو
9 Like

 

 
saamee
2011-07-19 23:50:12
كما نسيت اذكر موضوع الامن والامان الفاشل قبل الثورة اي مهتم بامكانه مراجعة تقارير الامن الجنائي و الامن السياسي سيجد عصابات السرقة في كل المدن و الارياف وتهريب المخدرات وو جود مناطق كثيرة لا يستطيع الامن الوصول اليها ووجود 63000 مجرم هارب لذا حصلت بعض حملات المداهمة قبل تاريخ الثورة هذا بالنسبة لحرمية الليل عدا الجرائم التي يتجنب المواطنين الابلاغ عنها لمعرفة التكاليف التي تزيد عن مقدار الجرم ..... وعند مراجعة تقارير الهيئة المركزية نجد امانا نهاريا في كل نواحي الحياة ÷÷÷÷÷÷÷÷÷÷
8 Like

 

 
saamee
2011-07-19 23:50:12
كما نسيت اذكر موضوع الامن والامان الفاشل قبل الثورة اي مهتم بامكانه مراجعة تقارير الامن الجنائي و الامن السياسي سيجد عصابات السرقة في كل المدن و الارياف وتهريب المخدرات وو جود مناطق كثيرة لا يستطيع الامن الوصول اليها ووجود 63000 مجرم هارب لذا حصلت بعض حملات المداهمة قبل تاريخ الثورة هذا بالنسبة لحرمية الليل عدا الجرائم التي يتجنب المواطنين الابلاغ عنها لمعرفة التكاليف التي تزيد عن مقدار الجرم ..... وعند مراجعة تقارير الهيئة المركزية نجد امانا نهاريا في كل نواحي الحياة ÷÷÷÷÷÷÷÷÷÷
8 Like

 

 
syrian_eagle2011
2011-07-20 00:09:33
لأ لسا في أمل .... بحسبة صغيرة ...إذا كان عدد المؤيدين و الحياديين مليون واحد مثلا و بعد 1500 شهيد مثلاً؟؟ .. قدرنا نغيير رأي واحد ... معناتها لأزمنا عدد صغير شوي من الشهداء لحتى نقدر نقنع باقي المليون برأينا انو سوريا و كرامتنا و الحرية أكبر من أي شخص بالدنيا.... بيطلعو بالظبط 1مليون 1500 شهيد 1500000000 ... إي لأ بسيطة كل يلي لازمنا مليار و نص شهيد ... لأ لسا في أمل شباب ... أما بالنسبة للوقت .. هوهو حسبوها لحالكن .. ما بيطلعو يا دوب كم مليار سنة ..خلينا ناخد العدد الحقيقي لسكان سوريا ناقص مليون ..يعني 21 مليون و كل اربع شهور في 1500 شهيد ... 21 مليون تقسيم 1500 بيطلع معنا 14 الف شهر ...يعني الف و مية و ستة و ستون سنة 1166 سنة .... لأ لأ الله يخليكن ... الموضوع رح يطول كتير ... بدنا نبعت خطاب للحكومة تزيد عدد القتلى قد ما بتقدر مشان نختصر الوقت خليهن مليون بالشهر بلكي بنخلص بسنتين إلا شوي هالموضوع و بنغير الحكومة و النظام ..تصبحو على وطن
11 Like

 

 
syrian_eagle2011
2011-07-20 00:09:33
لأ لسا في أمل .... بحسبة صغيرة ...إذا كان عدد المؤيدين و الحياديين مليون واحد مثلا و بعد 1500 شهيد مثلاً؟؟ .. قدرنا نغيير رأي واحد ... معناتها لأزمنا عدد صغير شوي من الشهداء لحتى نقدر نقنع باقي المليون برأينا انو سوريا و كرامتنا و الحرية أكبر من أي شخص بالدنيا.... بيطلعو بالظبط 1مليون 1500 شهيد 1500000000 ... إي لأ بسيطة كل يلي لازمنا مليار و نص شهيد ... لأ لسا في أمل شباب ... أما بالنسبة للوقت .. هوهو حسبوها لحالكن .. ما بيطلعو يا دوب كم مليار سنة ..خلينا ناخد العدد الحقيقي لسكان سوريا ناقص مليون ..يعني 21 مليون و كل اربع شهور في 1500 شهيد ... 21 مليون تقسيم 1500 بيطلع معنا 14 الف شهر ...يعني الف و مية و ستة و ستون سنة 1166 سنة .... لأ لأ الله يخليكن ... الموضوع رح يطول كتير ... بدنا نبعت خطاب للحكومة تزيد عدد القتلى قد ما بتقدر مشان نختصر الوقت خليهن مليون بالشهر بلكي بنخلص بسنتين إلا شوي هالموضوع و بنغير الحكومة و النظام ..تصبحو على وطن
11 Like

 

 
alhabal_222
2011-07-20 00:11:12
كلامك صديقي ممتاز يعني انته بدك تاسقط النظام بشكل تتدريجي وانا ارى انه كلام معقول لانه سقوط النظام في يوم وليله سوف يحدث صراع كبير بين المويدين والمعارضين يمكن ان تحدث حرب اهلية بجوز النظام قبل ما يسقط يساوي ميلشيات مثل ما صار بلبنان على كل حال لا رجعة للوراء يعني بسقوط النظام من الاخر
7 Like

 

 
alhabal_222
2011-07-20 00:11:12
كلامك صديقي ممتاز يعني انته بدك تاسقط النظام بشكل تتدريجي وانا ارى انه كلام معقول لانه سقوط النظام في يوم وليله سوف يحدث صراع كبير بين المويدين والمعارضين يمكن ان تحدث حرب اهلية بجوز النظام قبل ما يسقط يساوي ميلشيات مثل ما صار بلبنان على كل حال لا رجعة للوراء يعني بسقوط النظام من الاخر
7 Like

 

 
العروبه العروبه
2011-07-20 00:45:40
مع احترامي لوجهة نظر الأخ منتكس ،بتمنى إنك تقرا وجهة نظري ، يعني بعد كل يلي ماتو كرمال الحريه و التغير وإسقاط النظام ، وللي لسه عم يستناهن الدور بس لأنو ماركعو وباسوا متل ماغيرهن باسوا ..... رح تبقى مقتنع ياأخ منتكس .. مع إنو يضل بشار ويصير إصلاح سريع ........؟ إنو سيادتو رح يقدر يغيير شي ....؟ على علمك وعلم الجميع ... تم إلغاء قانون الطوارئ ... وكان بشكل سريع .... وينو التغيير ....؟ ولا مفكرين عنجد بقى إلو هيبه ولا رح يبقى للأبد سيادتو ....أخ منتكس كون منطقي شوي ... يعني من بين 23 مليون سوري مارح يلتقى شخص مناسب يكون رئيس يخدمنا ؟ ... إيه يخدمنا ... و نركع ونبوس بس أرض سوريه الحبيبه .
7 Like

 

 
العروبه العروبه
2011-07-20 00:45:40
مع احترامي لوجهة نظر الأخ منتكس ،بتمنى إنك تقرا وجهة نظري ، يعني بعد كل يلي ماتو كرمال الحريه و التغير وإسقاط النظام ، وللي لسه عم يستناهن الدور بس لأنو ماركعو وباسوا متل ماغيرهن باسوا ..... رح تبقى مقتنع ياأخ منتكس .. مع إنو يضل بشار ويصير إصلاح سريع ........؟ إنو سيادتو رح يقدر يغيير شي ....؟ على علمك وعلم الجميع ... تم إلغاء قانون الطوارئ ... وكان بشكل سريع .... وينو التغيير ....؟ ولا مفكرين عنجد بقى إلو هيبه ولا رح يبقى للأبد سيادتو ....أخ منتكس كون منطقي شوي ... يعني من بين 23 مليون سوري مارح يلتقى شخص مناسب يكون رئيس يخدمنا ؟ ... إيه يخدمنا ... و نركع ونبوس بس أرض سوريه الحبيبه .
7 Like

 

 
فايق ورايق
2011-07-20 01:10:56
لا جوع الى الامام... الى الامام ... ثورة . . . ثورة دج
7 Like

 

 
فايق ورايق
2011-07-20 01:10:56
لا جوع الى الامام... الى الامام ... ثورة . . . ثورة دج
7 Like

 

 
فادي سوريا
2011-07-20 03:23:46
يا الله قديش في خوثان بهالبلدحوينة كل كلمة وكل دقيقة بهالمقال
6 Like

 

 
فادي سوريا
2011-07-20 03:23:46
يا الله قديش في خوثان بهالبلدحوينة كل كلمة وكل دقيقة بهالمقال
6 Like

 

 
أبو لين
2011-07-20 06:58:46
يا أخي بدي أفهم شغلة بس ..ليش الربط بين حاكم وبين أرض عمرها ملايين السنين؟يعني هاد الربط المنحبكجي ماعم أفهمو..قبل المقبور وأبنه سوريا موجودة ومن أحلى ما يكون لشو كلام المكولكين أنه إذا أنقلع الله لا يردو سوريا رح تنهار إقتصاديا وسياسيا ومعنويا وإجتماعيا ووووووشو معو وكالة حصرية مثلا؟ومن مين ؟سوريا بخير بأخلاق ناسها وتعاملهن الطيب وجمال تناغم الأديان والطوائف والاطياف كلها من غابر الأزمانيعني بالله هدول العناصر هنن علمونا الأخلاق مثلا؟أصلا قسما بالله بنخاف ع حالنا منن أكتر من زعران الشارع؟ومنشان المقالة فيها ضعف بظن وفيها إندساس فعلي من عنصر بالأمن لإن عم يدرجوا فكرة الحوار مع المجرمين بطريقة أو أخرى...أو أنا يمكن دب ما فهمت
9 Like

 

 
أبو لين
2011-07-20 06:58:46
يا أخي بدي أفهم شغلة بس ..ليش الربط بين حاكم وبين أرض عمرها ملايين السنين؟يعني هاد الربط المنحبكجي ماعم أفهمو..قبل المقبور وأبنه سوريا موجودة ومن أحلى ما يكون لشو كلام المكولكين أنه إذا أنقلع الله لا يردو سوريا رح تنهار إقتصاديا وسياسيا ومعنويا وإجتماعيا ووووووشو معو وكالة حصرية مثلا؟ومن مين ؟سوريا بخير بأخلاق ناسها وتعاملهن الطيب وجمال تناغم الأديان والطوائف والاطياف كلها من غابر الأزمانيعني بالله هدول العناصر هنن علمونا الأخلاق مثلا؟أصلا قسما بالله بنخاف ع حالنا منن أكتر من زعران الشارع؟ومنشان المقالة فيها ضعف بظن وفيها إندساس فعلي من عنصر بالأمن لإن عم يدرجوا فكرة الحوار مع المجرمين بطريقة أو أخرى...أو أنا يمكن دب ما فهمت
9 Like

 

 
تودين
2011-07-20 08:19:51
مافي داعي للسخرية يا شباب هذا الشخص يمثل المعارضة الصامتة واللي هي أكبر شريحة بمجتمعنا .
9 Like

 

 
تودين
2011-07-20 08:19:51
مافي داعي للسخرية يا شباب هذا الشخص يمثل المعارضة الصامتة واللي هي أكبر شريحة بمجتمعنا .
9 Like

 

 
bloger
2011-07-20 09:00:24
يقول مارتن لوثر كينغ نحن لن نحاسب من وقف ضدنا نحن سنحاسب من وقف على الحياد ارجو ان تفكرا جيدا في ما سبق
8 Like

 

 
bloger
2011-07-20 09:00:24
يقول مارتن لوثر كينغ نحن لن نحاسب من وقف ضدنا نحن سنحاسب من وقف على الحياد ارجو ان تفكرا جيدا في ما سبق
8 Like

 

 
سعد
2011-07-20 12:40:57
الشارع لا ينتظر . فاما ان تلحق بالركب واما ان يفوتك القطار و وعندها ستصبح من المتسلقين
7 Like

 

 
سعد
2011-07-20 12:40:57
الشارع لا ينتظر . فاما ان تلحق بالركب واما ان يفوتك القطار و وعندها ستصبح من المتسلقين
7 Like

 

 
zaher masskor
2011-07-21 01:54:07
نفسي اسالي الاستاذ الكبير والفنان العالمي والذي بريشته يرسم اجمل معارض واجمل القصص رغبتي به ان يرسم فقط لانه اجمل من عبر عن المعارض ولكن سؤالي لو الدومري الى الان تنشر بسوريا هل كان معارض ام نجده الان مع لجنة محاربة الفساد ومزماره تحت ابطه جواب فنانا علي مع احترامي الكبير لفنك
6 Like

 

 
zaher masskor
2011-07-21 01:54:07
نفسي اسالي الاستاذ الكبير والفنان العالمي والذي بريشته يرسم اجمل معارض واجمل القصص رغبتي به ان يرسم فقط لانه اجمل من عبر عن المعارض ولكن سؤالي لو الدومري الى الان تنشر بسوريا هل كان معارض ام نجده الان مع لجنة محاربة الفساد ومزماره تحت ابطه جواب فنانا علي مع احترامي الكبير لفنك
6 Like

 

 
سورى أصيل
2011-07-22 14:38:36
الحياة موقف والله إنو بدون مايكون للواحد منا موقف بحس حياتو تافهة كل اللى بدنا ياه حرية و كرامة و ما منرضى بشوىة حرية بدنا كل الحرية التى يستحقها الإنسان عاشت سورية و يسقط آل الأسد قتلة الأطفال
6 Like

 

 
سورى أصيل
2011-07-22 14:38:36
الحياة موقف والله إنو بدون مايكون للواحد منا موقف بحس حياتو تافهة كل اللى بدنا ياه حرية و كرامة و ما منرضى بشوىة حرية بدنا كل الحرية التى يستحقها الإنسان عاشت سورية و يسقط آل الأسد قتلة الأطفال
6 Like

 

 
سوري اصلي
2011-07-22 23:40:15
بكير ولو...لسه في ناس تعتبر حالها حرة وبتفهم وممكن توقف او تؤيد القتلة عصابة الأسد
5 Like

 

 
سوري اصلي
2011-07-22 23:40:15
بكير ولو...لسه في ناس تعتبر حالها حرة وبتفهم وممكن توقف او تؤيد القتلة عصابة الأسد
5 Like

 

الاسم :
 
البريد الالكتروني :
* لا يظهر للزوار


أو تفضل بالتسجيل

اضف رايك :

 

يرجى ادخال الرمز الموجود بالصورة


 


 

 





قلم من الفولاذ الدمشقي




الاعضاء المسجلين: 3961
 يوجد حاليا 148 عضو مسجل و 140 ضيف يتصفحون الموقع
 
جميع المقالات والردود الواردة ضمن الموقع تعبر عن راي صاحبها وادارة الموقع غبر مسؤولة عنها
Ali Ferzat. All Content and Intellectual Property is under Copyright Protection | Media Planet © 2004 - 2011